verscion zeneise
Anselmo Roveda (Zena, 1972) giornalista e scrittô.
Son nasciuo a Zena, ma son cresciuo tra Arensen e a valadda de l'Orba.
Da bagarillo veueivo vegnî grende pe fâ o còsmonauta dappeu hò lasciòu perde e hò fæto studdi da meistro de scheua, ancon ciù grende in sciense de l'educaçion e in psicoanalixi. Into mezo hò fæto di strambi travaggi - tapulante, camê, manente de night - me son appascionòu de lettiatùa, tradiçioin di popoli e hò visciuo, pe amô e poexia, quarche meise a Arles. Da-o 1993 son torna a Zena, inti caroggi. Pe dexe anni hò travaggiòu comme educatô inti servixi soçiali de prevençion do desaxo di figgeu e di zoeni.
Giornalista pubbricista, da-o 1999 scrivo inscia revista meinsî “Andersen – Il mondo dell’infanzia” (>>>) e gh'ò de ätre collaboraçioin. Scrivo de lettiatùa, imàginaio e educaçion. In Spagna han pubbricòu o mæ saggio: Libros y literatura para jovenes en Italia hoy: escrituras, percepciones e ideas de infancia (in: Actas Jornadas Europeas del Libro Infantil y Juvenil 2004, Madrid 2005).
Comme autô me piaxe contâ, in poexia e no, stoie de dònne, òmmi, ombre e muagie.
Hò scrito ben de cose in italian - pe grendi e pe figgeu - de prosa, poexia e de saggistica.
I mæ libbri ti i treuvi inta verscion italiann-a do scito: sciacca chi.
O zeneise l'addeuvio sorvetutto pe a poexia.
O mæ urtimo libbro zeneise o se ciamma A farta d’euio de framboase into sangue spantegòu (poesie, introduzione di Alessandro Guasoni; Campanotto Editore, Udine 2006). Into 2007 de mæ poexie son sciortie inscia Gazzetta Ufficiale dei Dialetti de Catania.
Hò fæto ascì de traduçion de poexia da Bukowski, Keruoac, Rimbaud, Jimenez, de Mello Breyner Andresen (>>>)
Insce tradiçioin liguri hò pubbricòu, inte l'ätro, Barban, bibòu e foé. Dizionario delle figure fantastiche della Liguria (Il Golfo – Feguagiskia’ Studios Edizioni, Genova 2010) e Pupun de pessa. Ninna nanne e orazioni della buonanotte nella tradizione ligure (Il Golfo – Feguagiskia’ Studios Edizioni, Genova 2005) e hò fæto a preparaçion editoriâ do libbro da Laura Parodi La partenza, canzoniere del trallalero. Storie e testi dell’antico canto dei genovesi (Il Golfo – Feguagiskia’ Studios Edizioni, Genova 2006), a postfaçion do Dizionario visuale delle parlate dell’alta val Nure (a cura di Marta Devoti e Sara Quagliaroli: in 4 voll., Edizioni E Surnie, Ferriere PC 2006); e ancon hò fæto a çerca Daula daulagna. Filastrocche e cantilene infantili dell'alta valle dell'Orba con varianti d'area ligure e piemontese (online, 1998-2001).